بتتعصبى على ولادك ليه ؟
🏵وليه دايماً عصبية ؟
🏵سؤال بجد عايز اجابة وتكون واضحة وصريحة...
لو مش عارفة تربي ولادك اتعلمي واتثقفي لكن الصوت العالي عمره ما كان تربية .. والضرب هو كل شيء إلا التربية .
الصوت العالى هيكون نتيجته صوت عالي اعلي منه .
وساعتها عشان تثبتي نفسك وانك مش ضعيفة هتكوني مضطرة تضربي ﻷن الضرب رد فعل طبيعي بعد العصبية والصوت العالي ..
حبيبتي هاتي ودنك واسمعي الكلمتين دول بس اول حاجه نتفق انك هتنفذى الكلام دا فعلاً عشان تعرفي تربي اولاد اسوياء محترمين لنفسهم وليكي وللجميع...
أولاً :
قبل اى حاجه اول متحسي انك خلاص هتنفجرري وهتكسرى وتتعصبي . أول حاجة استغفري الله مره واستعيذي بالله من الشيطان الرجيم مره كمان وخدي نفس عميق مرتين وخرجيهم ببطىء . وغيري وضعك لو واقفة اقعدى لو قاعدة تقفي . ولو تقدري تخشي تتوضي يبئا انتي كده نفذتي كل نصائح النبي في موضوع الغضب ..
أما تقومي الصبح عاهدي نفسك إنك :
مش هتخاصمي طفلك
مش هتشتميه او تهنيه مهما كان غلطه
مش هتضربيه نهائي
مش هتصرخي ولا هتتعصبي عليه
أكثري من الاستغفار بنية ان ربنا يقويكي علي تحمل طفلك وتصرفاتة .
خليكي عارفة انك هتتحاسبي علي تعاملك مع طفلك امام الله
خليكي فاكرة ان مليون ست غيرك محرومين من نعمة انهم يكون عندهم طفل فاحمدى ربنا علي النعمة دي واشكرية عليها عشان يباركلك في ولادك ومتكونيش سبب ان ربنا يحرمك منهم بسوء تصرفك ...
صدقيني لو كنتي محرومه من الانجاب كنتي بكيتي بدل الدموع دم لو عرفتي ان في امهات بتضرب اولادهم مهما كان سببك وعذرك وكنتي هتتمني تكوني مكانها عشان تعاملي طفلك احسن معاملة مهما عمل ..
7- اكتبي الكلام ده وعلقية أمامك في المطبخ أو على الثلاجة او في مكان تشوفيه دايماً .. وكل متشوفي الكلام دا قولي الحمدلله على نعمة الاطفال وادعي ربنا انه يعينك علي تربيتهم ..
----------
🏵ثانياً :
شوية تنبيهات عملية هيساعدوكي تقللي من عصبيتك...
لو اطفالك صغيرين جهزى ليهم مكان مناسب يلعبوا فيه بحيث لا تكون الأشياء القابلة للكسر في متناول أيديهم ..
قولي لنفسك دايماً أن أبناءك ما زالوا صغارًا في مرحلة استكشاف العالم الخارجي مرحلة تتميز بالحركة المستمرة والنشاط، والانطلاق
ودي حاجه تفرحك لو رزقتي بطفل كفيف او معاق او مريض كنتي هتتحرمي من نعمة اللعب مع ولادك والاستمتاع بأمومتك ..
لو حد من اطفالك غلط اعملي نفسك مش واخده بالك لو كان الامر مش خطير زي الاقتراب من النار او الكهربة واكتفي بتنبيه بنبره حاسمه ..
ولو عرف انك شفتيه وهو بيغلط . فقبل ما تبدئي في عقابة - لازم تستعيذي من الشيطان وتستغفري و تغيِّري وضعك فلو كنتي قائمة فاجلسي، وإن كنت جالسة فاضطجعي كما علمنا رسول الله (صلى الله عليه وسلم) في حالات الغضب وده هيخليكي تهدي خالص ..
فكري نفسك دايماً ان ولادك لا دخل لهم في الضغوط والتوترات اللي بتأثر سلبياً عليكي وأنه لا حول لهم ولا قوة، وإذا دعتك قوتك لعقابهم فتذكَّري قوة الله عليك ..
كافئي نفسك بعبارات مشجعه في كل موقف تتحكمي فيه في نفسك ومتغضبيش .. زي انا ام مثالية .. انا هقدر اتحكم في نفسي . انا أتغلبت علي نفسي ونجحت في عدم الغضب و و و و ..
ولو فشلتي في مره في عدم ضبط انفعالاتك اوعي تقللي من نفسك وتقولي انا ام فاشلة او انا مش هعرف أربي .. قولي فشلت المره دي بس هنجح المره الجايه ان شاء الله . ودايما استعينى بالله واستغفري واستعيذي بالله من الشيطان .
حاولي تبينى الجوانب الإيجابية في أولادك، والثناء عليها لما طفلك يعمل حاجة صح او حاجة انتى بتعلميها لية ، مش بس كدة لا قولى لأبوه كمان عن التصرف الصح اللى عملة ابنك (اجعلي من استثمار الإيجابيات علاجًا للمنغِّصات).
اثبتت الدراسات والبحوث العلمية ان الاطفال اللي بيتعرضوا لنوبات غضب وعصبية وضرب من الأهل اكثر عرضه للأمراض النفسية والعصبية والاكتئاب والشعور بالوحده والانتحار في بعض الاحيان من غيرهم
ثالثاً :
طيب لما ولادك يغلطوا تعملي ايه كبديل للعصبية؟؟؟
هنعرف الأجابة فى الجزء التانى من عصبيتى و أولادي
ممكن إللى حب منشورى يعلق بالصلاة على النبي